ജീവിത പ്രതിസന്ധികളിൽ തളരാതെ മുന്നേറാൻ സ്ത്രീകൾക്ക് കരുത്തേകി കേരള വനിതാ വികസന കോർപറേഷന്റെ ‘മിത്ര 181’ ഹെൽപ്പ്ലൈൻ.
ജീവിതത്തിൽ തോറ്റുപോകരുതെന്നും സർക്കാർ ഒപ്പമുണ്ടെന്നും ഉറപ്പുനൽകിക്കൊണ്ട് ആരോഗ്യ വനിതാ ശിശുവികസന വകുപ്പ് മന്ത്രി വീണാ ജോർജ് 181 എന്ന ഹെൽപ്പ്ലൈൻ നമ്പർ പങ്കുവെച്ചു. ഏറ്റവും വിശ്വസിച്ചവരിൽ നിന്നുപോലും ഉണ്ടാകുന്ന തിക്താനുഭവങ്ങളിൽ പകച്ചുനിൽക്കാതെ, സ്വകാര്യത പൂർണ്ണമായും സംരക്ഷിച്ചുകൊണ്ട് നീതി ഉറപ്പാക്കാൻ ഈ സംവിധാനം സഹായിക്കുമെന്ന് മന്ത്രി ഫെയ്സ്ബുക്ക് കുറിപ്പിലൂടെ വ്യക്തമാക്കി.
ജീവിതത്തിലെ സ്വപ്നങ്ങൾ തിരിച്ചുപിടിക്കാനും പ്രതിസന്ധികളെ അതിജീവിക്കാനും സർക്കാരും വനിതാ വികസന കോർപറേഷനും കൂടെയുണ്ടാകും. കൗൺസലിങ്, നിയമോപദേശം, അടിയന്തര സംരക്ഷണം തുടങ്ങിയ സഹായങ്ങൾ 181 എന്ന നമ്പറിലൂടെ ലഭിക്കും. 24 മണിക്കൂറും പ്രവർത്തിക്കുന്ന ഈ സംവിധാനം സ്ത്രീകളുടെ സുരക്ഷയ്ക്കും ക്ഷേമത്തിനുമായി വിരൽത്തുമ്പിൽ ലഭ്യമാകുന്ന സേവനമാണ്.
