വെറും നാലുമാസം കൊണ്ട് ലക്ഷങ്ങൾ കൊയ്യാം
കൃഷി ചെയ്യാൻ ആഗ്രഹിക്കാത്ത മലയാളികൾ വളരെ കുറവാണ്. കുറഞ്ഞ അദ്ധ്വാനത്തിൽ കൂടുതൽ പണം നേടാനാകുന്ന കൃഷികളാണ് എപ്പോഴും മലയാളികൾ തെരയുന്നത്. അങ്ങനെ നോക്കുന്നവർക്ക് ഒരു നല്ല ഓപ്ഷനാണ് മധുരക്കിഴങ്ങ്. കിഴങ്ങുകളിൽ മധുരമുള്ള ഒന്നാണ് മധുരക്കിഴങ്ങ്. ധാരാളം അന്നജവും നാരുകളും അടങ്ങിയ ഇവ ശരീരത്തിലെ ഗ്ലൈസമിക് ഇൻഡെക്‌സ് കുറച്ച് പ്രമേഹത്തെ ചെറുക്കും.
വൈറ്റമിന്‍ സി, ബീറ്റാകരോട്ടിൻ അടങ്ങിയിട്ടുള്ള മധുരക്കിഴങ്ങ് എല്ലുകളുടെയും പല്ലുകളുടെയും വളർച്ചയ്ക്കും, പ്രതിരോധശേഷി നൽകി രോഗസാദ്ധ്യത കുറയ്ക്കുന്നതിനും ഉത്തമം. കൂടാതെ ഇതിലെ കരാറ്റനോയ്ഡുകൾ പ്രായമായവരിൽ ഉണ്ടാകുന്ന കാഴ്ചപ്രശ്‌നങ്ങൾ പരിഹരിക്കുന്നു. ചർമത്തിൽ ചുളിവുകൾ വീഴുന്നത് തടയാനും മികച്ചതാണ്. അതിനാൽ തന്നെ ഇവയ്ക്ക് ഡിമാൻഡും ഏറെയാണ്. പരമാവധി നാലുമാസം കൊണ്ട് ഇവ വിളവെടുക്കാം.
കൃഷി ചെയ്യേണ്ട രീതി
20 – 30 സെന്റീമീറ്റർ നീളമുള്ള നാലോ അഞ്ചോ നീളമുള്ള മുട്ടുകളുല്ള കരുത്തുള്ള വള്ളിക്കഷ്ണങ്ങൾ ആണ് നടേണ്ടത്. വള്ളികളുടെ തലപ്പും നടുഭാഗവും നടാനെടുക്കാം. നല്ല സൂര്യപ്രകാശമുള്ള വെള്ളക്കെട്ടില്ലാത്ത സ്ഥലത്താണ് കൃഷി ചെയ്യേണ്ടത്. കൃഷിയിടം കിളച്ചൊരുക്കി തടമെടുത്ത് കൂന കൂട്ടിയും വള്ളി നടാം. അടിവളം ചേർക്കാൻ വിട്ടുപോകരുത്.
ഒരു സെന്റിന് രണ്ട് കിലോ കുമ്മായം, സെന്റിന് 40 കിലോ ചാണകം, കമ്പോസ്റ്റ് ഇതെല്ലാം അടിവളം ആയി ചേർക്കാവുന്നതാണ്. നടുമ്പോൾ വള്ളിയുടെ മദ്ധ്യഭാഗത്തെ മുട്ടുകൾ മണ്ണിൽ നന്നായി താഴ്ത്തിയും മുറിച്ച് അഗ്രഭാഗങ്ങൾ പുറത്തുമായി വേണം നടാൻ. കൂനകളിലാണ് നടുന്നതെങ്കിൽ കൂനകൾ തമ്മിൽ രണ്ടരയടി അകലം വേണം. ഒരു കൂനയിൽ മൂന്ന് വള്ളിക്കഷണങ്ങൾ വരെ നടാം. വള്ളികൾ നട്ടശേഷം നനച്ചുകൊടുക്കണം. ഇത് വേഗത്തിൽ വേര് മുളയ്ക്കാൻ സഹായിക്കുന്നു. നട്ട് രണ്ടാഴ്ച കഴിഞ്ഞും അഞ്ചാഴ്ച കഴിഞ്ഞും കളനീക്കി മണ്ണ് കൂട്ടാം. വള്ളി നീളുന്നത് കണ്ടാൽ വള്ളികൾ ഇളക്കി കൊടുക്കണം. പരമാവധി നാലുമാസം കൊണ്ട് ഇവ വിളവെടുക്കാം. മാർക്കറ്റിൽ നല്ല ഡിമാൻഡുള്ളതിനാൽ ഈ കൃഷി ചെയ്ത് ലക്ഷങ്ങൾ സമ്പാദിക്കുന്നവരും ഉണ്ട്.
