നിരന്തരം മോദി സ്‌തുതി; തരൂരിനെതിരേ നടപടിക്ക്‌ ഹൈക്കമാന്‍ഡില്‍ സംസ്‌ഥാന നേതാക്കളുടെ സമ്മര്‍ദം
തിരുവനന്തപുരം: കോണ്‍ഗ്രസ്‌ പ്രവര്‍ത്തകസമിതിയംഗം ശശി തരൂര്‍ എം.പിക്കെതിരേ വീണ്ടും പാളയത്തില്‍ പട. തരൂര്‍ നിരന്തരം നടത്തുന്ന മോദി സ്‌തുതിക്കെതിരേ നടപടി വേണമെന്ന്‌ സംസ്‌ഥാനത്തുനിന്നുള്ള നേതാക്കള്‍ ഹൈക്കമാന്‍ഡിനോട്‌ ആവശ്യപ്പെട്ടു. നടപടിയെടുത്തില്ലെങ്കില്‍ സംസ്‌ഥാനത്തു പാര്‍ട്ടിക്ക്‌ ദോഷംചെയ്യുമെന്ന്‌ നേതാക്കള്‍ എ.ഐ.സി.സി. സംഘടനാകാര്യ ജനറല്‍ സെക്രട്ടറി കെ.സി. വേണുഗോപാലിനെ അറിയിച്ചു.
പാര്‍ട്ടിയില്‍നിന്നു പുറത്തുപോകുമെന്ന സന്ദേശമാണ്‌ തരൂര്‍ നല്‍കുന്നതെന്നു നേതാക്കള്‍ ചൂണ്ടിക്കാട്ടുന്നു. തെരഞ്ഞെടുപ്പുകള്‍ കഴിഞ്ഞാല്‍ രാജ്യതാത്‌പര്യത്തിനായി സഹകരിച്ച്‌ മുന്നോട്ടുപോകണമെന്നും ഇന്ത്യയിലും ഇത്തരം സാഹചര്യമാണുണ്ടാകേണ്ടതെന്നും തരൂര്‍ ‘എക്‌സി’ല്‍ കുറിച്ചിരുന്നു. യു.എസ്‌. പ്രസിഡന്റ്‌ ഡോണള്‍ഡ്‌ ട്രംപും ന്യൂയോര്‍ക്ക്‌ മേയറായി തെരഞ്ഞെടുക്കപ്പെട്ട സൊഹറാന്‍ മംദാനിയുമായുള്ള കൂടിക്കാഴ്‌ചയുടെ ചിത്രങ്ങള്‍ പങ്കുവച്ചാണ്‌ തരൂരിന്റെ കുറിപ്പ്‌.
‘ജനാധിപത്യം ഇങ്ങനെയാണ്‌ പ്രവര്‍ത്തിക്കേണ്ടത്‌. തെരഞ്ഞെടുപ്പുകളില്‍ നിങ്ങളുടെ കാഴ്‌ചപ്പാടിനുവേണ്ടി ആവേശത്തോടെ, തടസങ്ങളൊന്നുമില്ലാതെ പോരാടുക. എന്നാല്‍ അത്‌ കഴിഞ്ഞാല്‍ രാജ്യത്തിന്റെ പൊതുതാത്‌പര്യങ്ങള്‍ക്കായി പരസ്‌പരം സഹകരിക്കാന്‍ പഠിക്കുക. ഇന്ത്യയില്‍ ഇത്‌ കാണാന്‍ ഞാന്‍ ആഗ്രഹിക്കുന്നു എന്റെ പങ്ക്‌ നിര്‍വഹിക്കാന്‍ ഞാന്‍ ശ്രമിക്കുന്നു’ എന്നാണ്‌ തരൂരിന്റെ കുറിപ്പ്‌.
കഴിഞ്ഞദിവസങ്ങളില്‍ തരൂര്‍ ദക്ഷിണാഫ്രിക്കയിലായിരുന്നു. പിന്നാലെ, ജി20 ഉച്ചകോടിക്കായി പ്രധാനമന്ത്രി നരേന്ദ്രമോദിയും അവിടെയെത്തി. ഡെസ്‌മണ്ട്‌ ടുട്ടു അനുസ്‌മരണപ്രഭാഷണത്തിനാണ്‌ ദക്ഷിണാഫ്രിക്കയില്‍ പോയതെന്നു തരൂര്‍ പറയുന്നു. രാംനാഥ്‌ ഗോയങ്ക പ്രസംഗപരമ്പരയില്‍ പ്രധാനമന്ത്രി മോദി നടത്തിയ പ്രഭാഷണത്തെ പ്രകീര്‍ത്തിച്ചും തരൂര്‍ രംഗത്തെത്തിയിരുന്നു.
